Illa vegið að Félagi Anti-Rasista

Í DV þann 3. Apríl birtist á forsíðunni frétt um að miðum hefði verið dreift í hverfi Viðars Helga Guðjohnsen, formanns Landsambands Ungra Frjálslyndra.

Á miðunum sem andrasistar voru sagðir hafa dreift var spurt hvort rasisti byggi í hverfinu og gaf Viðar sig strax fram sem manninn sem um var rætt. Það hlýtur að teljast nokkuð merkilegt að hann hafi vitað það strax því í venjulegu íbúðarhverfi eru um 50-100 hús og enn meira af fólki.

Á baksíðu er svo fréttin sjálf en þar er sagt að anti-rasistar væni formann Ungra Frjálslyndra um kynþáttahatur. Viðar fær fyrstu orðin í byrjun greinarinnar og byrjar í vörn er hann segist ekki vera rasisti. Farið er létt yfir sögu Frjálslyndra og þátt Viðars í að dreifa fordómum gegn innflytjendum fyrir kosningar 2007 og að Frjálslyndir hafi á þeim tíma (og enn þann dag í dag) verið sakaðir um rasisma.

Skilaboð miðans eru svo birt orðrétt eftir að ýjað er að því að þeir sem dreifðu miðunum hafi verið í Félagi Anti-Rasista og hafi gert það til að hóta Viðari að draga til baka íhugaða lögsókn sína gegn félaginu og mér vegna greinar minnar "Misheppnaðir tónleikar gegn rasisma" þar sem ég m.a. gagnrýni bæði Frjálslynda Flokkinn og Viðar.

Viðar telur miðadreifinguna ámælisverða og kvartar undan því að þetta sé ekki einungis árás á sig heldur einnig á skoðanafrelsi manna. Hér er sami maður að tala um skoðanafrelsi og sá sem hótar heilum samtökum og mér öllu illu fyrir að birta grein sem honum líkaði ekki við. Viðar ætti allavega fyrst að læra sjálfur um hvað skoðanafrelsi snýst áður en hann segir aðra vanvirða það.

Dane Magnússon, formaður Félags Anti-Rasista, á síðustu orð greinarinnar en þar segir hann félag sitt á engan hátt tengjast dreifingu miðana.

DV fer afar illa að ráði sínu í öllum þessum fréttaflutningi. Fjórum sinnum er Félag Anti-Rasista beint og óbeint tengt við miðadreifinguna þrátt fyrir engar sannanir. Tvívegis er gefið í skyn að mín grein hafi ollið miðadreifingunni. Blaðamaður tekur afstöðu til þess að Viðar sé ekki kynþáttahatari án raka og leyfir honum einnig að koma því á framfæri sjálfum í byrjun greinar. Dane Magnússon fær sáralítið pláss til að tjá sig um málið og það eftir að fréttaflutningurinn hefur ítrekað mótað skoðanir fólks um að Félag Anti-Rasista hafi staðið á bak við þetta. Hér er því félagið dæmt fyrirfram af DV sem sekt á dreifingu miðana.

Ég veit ekki til þess að Félag Anti-Rasista hafi hingað til stundað miðadreifingar en ef þeir hafa gert það þá hafa þeir örugglega gert það undir nafni og hefðu gert það í þessu tilfelli ef þeir hefðu dreift miðunum. Það mætti halda að blaðamaður ásamt mörgu öðru fólki hafi ítrekað litið fram hjá þeim parti miðans þar sem sendandinn gefur sig upp "Í-P action group".

Þeir sem gætu hafa dreift miðunum undir þessu nafni eru t.d. útlendingar sem teldu sér stafa ógn af Viðari og FF, fólk í hverfinu með þeldökkt barn, áhyggjufullur borgari eða jafnvel einhver samtök sem styðja Félag Anti-Rasista en hafa gert þetta í trássi við forystu félagsins. Nánast allir gætu legið undir grun ef út í það er farið. Ég hef þó sjálfur mína ritskoðuðu kenningu um málið.

Fréttaflutningur DV í þessu máli kemur mjög á óvart miðað við að gæði blaðsins hafa batnað mjög undanfarið ár. Ég hvet DV til að vanda sig betur næst í fréttaflutningi sínum og varast hvern það upp hefur og hvern það niður dregur.

Sveinn Helgason

Athugasemdir

[Jóhann Kristjánsson, 9.4.2008 kl. 16:01]

Sveinn ég hvet þig til að líta á bloggsíðu mína. Þar kem ég með hugmyndir til lausnar á málefnum innflytjenda. www.joik7.blog.is

[J. Einar Valur Bjarnason Maack , 14.4.2008 kl. 15:33]

Farið er létt yfir sögu Frjálslyndra og þátt Viðars í að dreifa fordómum gegn innflytjendum fyrir kosningar 2007 og að Frjálslyndir hafi á þeim tíma (og enn þann dag í dag) verið sakaðir um rasisma.

 Þetta getur nú tæpast talist málefnalegt, hvar er alið á fordómum? Það var varað við hættum óhefts innflutning vinnuafls og óstjórn í þessum málum.

Hvað hefur komið á daginn? Það sem við í FF vöruðum við og hefur komið fram er að stórfellt mansal er í gangi með erlent vinnuafl, og þá ekki aðeins í kynlífsiðnaði heldur líka byggingariðnaði og annarsstaðar. Ég myndi ekki kalla það annað en þrælahald þegar fullorðnir menn eru með 150000kr á mánuði fyrir 16 stunda vinnudag, 6 daga vikunnar.

Eins hafa tekið sig upp glæpagengi og nánast ALLT það sem við vöruðum við. Ef þú læsir líka yfir málflutning okkar í FUF og FF þá er hvergi minnst á KYNÞÁTT. Kynþáttur er RAS parturinn af rasisma. Ég man ekki eftir því að neinn talaði um húðlit eða kynþátt í kosningabaráttunni, nema helst þeir sem voru hvað uppteknastir við að sverta mannorð FF.

Ég sit í stjórn FUF og er harður and-rasisti, þér að segja. Ég geri ekki upp á milli fólks eftir kynþætti, enda væri mér þá stórkostlega uppsigað við sjálfan mig, enda flestir þeir sem ég er ósammála og í nöp við af sama kynþætti og ég. Mér þykir það einstaklega grunnhyggið og barnalegt að væna okkur í FF um rasisma þegar við erum að tala um innflytjendamál. Ég vænti þess að sá hópur íslenskra Pólverja sem nú safnar undirskriftum gegn því að pólskum glæpamönnum sé hleypt inn til landsins séu þá líka Pólverjahatarar.
Ég átti góðar samræður við þeldökkan mann frá Afríkulandi um daginn og hann var mér sammála í því að við þyrftum stjórn á innflytjendamálum. Ég vænti þess að hann sé 'rasisti' líka. 

Ég er einstaklingshyggjumaður og ég veit það fyrir víst að Viðar er það líka. Okkur býður báðum við þeim sauðslega hugsunarmáta að setja fólk undir einn stóran hatt á grundvelli húðlitar í stað þess að einstaklingurinn, sama hver genetískur uppruni hans er, sé metinn af sínum eigin verðleikum.

Mér þætti líka gaman ef þið athugið lykilpersónur innan FF og fjölda þeirra sem hafa átt eða eiga maka af erlendu bergi brotna. Ég held að það sé væntanlega hæsta hlutfallið innan nokkurar stjórnmálahreyfingar hérlendis. Við höfum þá sennilegast öll hatað maka okkar líka?

Þó að það séu örugglega til einhverjir einstaklingar innan FF sem aðhyllast rasisma er það enganvegin síður fordómafullt að væna hvern einn og einasta einstakling þessa flokks um skoðanir sem síst eiga uppá pallborðið hjá flokknum vegna nokkurra slakra eintaka innan flokksins.
Það er eins og að væna heila þjóð eða kynþátt um að vera eins léleg og þeirra síðstu einstaklinga. Við viljum metin af verðleikum en ekki fordómum, sama hvort það eru kynþáttafordómar eða flokkafordómar. 

Með kærri kveðju og von um að baráttan við að uppræta fordóma gangi vel, ég er ávalt til í að leggja baráttunni gegn fordómum lið, en þið gerið það ekki með því að ala á þeim.